المواصلات

قمت بدرى او متأخر و عاوز تلحق شغلك او تروح اى مصلحة تانية ... او شئ تتصدم بية هو المواصلات سواء كانت #مترو..... #اوتوبيس ... #مكروباص ..#تاكسى .... #التوكتوك  او حتى #عربية_كارو

1 - #التوك توك

مواصلة غربية شبة الخنفسة و على ما اعتقد ان مصر كلها عرفاة خاصة بعد ما الرئيس مرسى وجهه لة سلام و تحية .... مواصلة بدون رقابة او ترخيص و حاجة فل الفل .. عشان كدا صحاب التوكتوك نازلين دبح فى اى حد بيركب معاة .. طبعا عشان ملوش تعريفة او اجرة ثابتة دا غير انة مالوش عداد .. المواصلة دى بتلاقية فى المناطق الشعبية و اللى صعب بتمشى فيها العربية .. طبعا بعد الثورة مصر كلها مليانة توكتوك

 فى بعض الاحيان ... سواق التكتوك بيكون مش انسان .. بيكون كائن غريب يتعايش فى وسطنا

طب اية الحل ؟

حكومتنا قالت انة لا غنى عن #التوك توك .. يعنى اصبحى شئ مهم فى حياتنا .. يبقى لازم نعمل لة رقابة مهمة و

ترخيص و لوحات معدنية   و لازم يترخص عشان يكون له رقابة جامدة ... او نركب له عداد عشان يكون لية تعريفة

2- #المترو 

.مش هأنسى كل يوم الصبح و انا راكب المترو بسمع ست كدا بتقعد ترغى فى الميكروفون و بتقول ( مترووو الانفاق نقلة حضارية ) هو ممكن يكون مترو الانفاق نقلة حضارية لكن ركاب المترو احيانا بيكونوا رافضين النقلة الحضارية دى .. مش الركاب بس و الموظفين كمان .....!!!!

الموضوع بيبدأ من شباك التذاكر .. هأكلمكم فى مشهد زحمة فى محطة من المحطات ممكن يكون فى اربع شبابيك مش شغال فيهم غير واحد و علية طابور رجالة على ستات

انا وقفت فى طابور التذاكر ... الراجل اللى ورايا مش عارف لازق كرسة فى ظهرى لية ؟ .. (يفضل يكون فية مسافة ) انا قلت لة ارجع وراء عشان كرشك لازق فى  ظهرى قال لى : ماشى يا استاذ بس من غير تناكة ... لية بقى الطابور مش بيمشى ؟؟؟

فكرت و عرفت لة ايجابات كتير اولها ان الركاب مش معاها فكة .. تخيل لو الطابور دا كل واحد معاه مائة او ورقة بمئتين و رايح عشان يطلب تذكرة ... اكيد الموضوع هايطول عشان الباقى يكون 99 فكة و طبعا الراجل الموظف مش عاوز يعجز فبيركز على الباقى اللى بيطلع كويس اوى .. دا سبب من الاسباب و سبب اخر ان تلاقى راكب من الركاب بيتخانق مع الموظف اللى على الشباك فسيادة الركاب اللى وراهم ينتظروا البشاوات لما يخلصوا الخناقة .. او المترو يحن علينا و يفتح الشبابيك التانية ..

...بص بقى الحركة دى  اول ماتوصل للشباك تلاقى واحد جة جنبك ونغزك نزغة بنت كلب و يقولك هات تذكرة .. طب يا( أمور اقف فى الطابور) لا هو عاوز يخلص و غيرة يولع .. بعد ما قطعنا و الحمد لله تيجى مرحلة استقبال المترو لو انت فى المحطات الزحمة ( السادات – الشهداء – عتبة ) بتلاقى موضوع الدخول و الخورج تهلكة .... لية ؟ تخيل عربية المترو و فيها ناس عاوزة تخرج و ناس تانية فى نفس الوقت عاوزة تدخل و الاتنين لما يتصدموا مع بعض يحدث احتكاك و بعد الاحتكاك اشتباك و بعد الاشتباك معركة مابين اللى داخلين و اللى خارجين .. المترو نفسة حاول يحل الموضوع دا انة يخلى ابواب للدخول و ابواب للخروج لكن الموضو دا فشل ... !!!!!!!! لية ؟

• عشان تعمل قانون لازم يكون لة متابعة
• عشان الركاب نفسها مش عاوز تطبق النظام

طب مشكلة زى دى حلها اية ؟

لازم اللى فى خارج المترو بنتظر اللى خارج من ابواب المترو ..  و المترو يسيب فترة كويسة للدخول و الخروج

كنت عاوز اقو حاجة

بمناسبة الاحتكاك .. الناس مش بتحتك بجسمها بس لكن دى كمان بتحتك بألفاظ  زى ( ناس بهائم , هاتفضلوا متخلفين , مافيش دم )

فياريت نتحضر بقى و بلاش الموضوع دا و مانعملهوش تانى

تعالى بقى نشوف سلوك  سئ بيحصل من العيال اللى بتعلق الباب .. يقوم المترو يتأخر يقوم المتور اللى وراة يتعطل .. تقوم الحركة كلها تتعطل بسبب حيوان .. عارف اية الحل .. اللى يعمل كدا اضربة بالقلم و هاتكسب ثواب كبير .. عارف لية ؟ عشان بيعطل مصالح ناس كتير

-         احيانا كتير بيكون سبب ان الباب مايتقفلش تلاحم الناس و كأن المترو دا هايكون أخر مترو فى  العالم و الحل بسيط جدا ... ممكن تستنى المترو اللى بعدة لعله يكون فاضى .. الموضوع مش هأخد منك وقت كتير .. دا من 3 الى 5 دقائق مش هاتغير فيهم حاجة ...

• دخلنا المترو و الحمد لله ( حمد لله على السلامة )

( سؤال على الماشى ) ( اختر ما بين الاقواس )

لماذا تم نقل عربة السيدات من العربة الاولى الى العربتان فى المنتصف ....

( عشان الرغى بتاع الستات و السواق مش بيعرف يسوق – عشان لو حصلت حادثة الستات ماتموتش الاول ) ؟

المهم ... بيكون فية كراسى لذوى الاحتياجاتى الخاصة بس اللى بيقعد عليهم مش ذوى الاحتياجات الخاصة .. بصراحة احيانا كتير لما بيكون فيه حد كبير او واحدة حامل او معاها رضيع الناس بتقوم لة ....

الحاجة المسلية بقى عروض (تميمة) اللى بتكون فى المترو ( مكن حلاقة , لازق للجروح , عسلية , اقلام , كراريس , اذكار ....) ولا بقى المتسولين ..... دول بقى كارثة ...و انواعهم كتير

• تترمى ورقة على حجرك عشان تتعاطف معاها
• اللى يعيط و يقول لك ان امة فى الجيش و ابوه ميت
• اللى بيتسول بالعاهة بتاعتة
• اللى بيكون محتاج بجد .. بس دا بصراحة مش بأشوفة تانى لكن فية ناس بأشوهم كتيييييير .. اكتر ما بأشوف عيلتى

( انت لو عاوز تدى حد ادى انا مش هأقدر اقول لك لأ ... انا بأتكلم فى سلوك .. انا عن نفسى بأدى ناس منهم )

خلصت المترو و جات المحطة بتاعتك ؟

حمد لله على سلامتك

3 -  #الاوتوبيس  

طبعا مافيش كلام و على ما اعتقد شفناة بعيونا قبل لما تركبة بيكون شكلة اذاى و بصراحة المترو رفع ضغط كبير جدا من المواصلات فى القاهرة .. عاوز لو تشوف صدق كلامى شوف المترو لما بعطل بحصل اية فى حركة القاهرة ... زحمة و بهدلة

سواق اوتوبيس كان بحكى لى مرة عن زحمة حصلت بسبب عطل فى المترو بقول ان العربية كانت فاضية لحد ما كانت هاتنفجر بالناس و ساعتها لكمثرى ماكانش عارف يقطع لمين ولا لمين .. بيقول لى من كتر الزحمة كنت قاعد على طرف الكرسى

اية الحل ؟؟؟

زود المركبات و زد الخطوط فى الاماكن الجديدة ... اعمل خط موازى لة عشان الناس تنتشر مايكونوش على خط واحد

(ملحوظة)

البلد اللى مش بيكون فيها كرسى فاضى فى الاوتوبس هى مصر

معلومة فكاهية على الماشى

تعرف ان كل سواقين الهيئة اسمهم اشرف ؟؟؟؟ دا بقى بيكون شفرة عشان ماحدش يشتكى السواق

4- #المكروباص

دى مواصلة تكتب فيها مكتبة بحالها و دا بقى مهم جدا .....جدا ........ جدا .. دا بقى اللى بيوصلك لحد الحتة اللى انت عاوزها مش انت لوحدك دا لمصر كلها مش هاتقدر تستغنى عنة ( ترامكو , راما , تيوتا )

بصوا الحاجات دى بتحصل على طول و بتتكرر على  نفس النمط

-         لما السولار بيغلى

تلاقى الاجرة اترفعت بدون سبب او بدون بلاغ من الحكومة و تلاقى المكروباص يتعطل عشان الربع جنية اللى زاد

عاوز الحق .. المفروض انك ماتدفعش غير اللى تطلبة منك الدولة و لازم الجشع بتاع السواقين يختفى بس للأسف مش هايختفى لوحدك .. ساعتها هاتكون مؤذن فى مالطا .. لازم يكون الركاب ايد واحدة .. الغريب ان السواق مش يقول قبل ما تركب ... لا يفاجئك بعد ماتركب المكروباص

كلنا بنقول ان البلد دى فئة سواقين الكروباص فئة زبالة

ملحوظة

( السواقين نفسهم بيقولوا على نفسهم كدا )

طب نعمل اية عشان ننظف الوساخة دى ؟

تخيل لو مصر كلها استغنت عن المكروباص لمدة اسبوع ... شوف بقى ساعتها لما المكروباصات تشد الزبائن و تقول لها تحت امرك ..

اسواء حاجة لما تلم الاجرة يعنى تخيل لما تكون فى الكنبة اللى فى النص بتكون وسيط الفكة بين السواق و بين الركاب و انت تلوص ما بين الاتنين .. عشان خلاص اتعينت مرسال مابينك و بين السواق و الركاب ..

معظم الشعب المصرى حتى  معظم اللى معاهم ركاب مرتبطين بالمكروباص .. هو ترابط مكروة لكن ما باليد حيلة .. خاصة فى وقت لزحمة بتلاقى الناس بتدخل من الشباك

عاوز حلها ؟

مرة فى العباسية كنت بأشوف طابور للناس و هى داخلة الكروباص ... فكرة رائعة و حلوة بجد

ياريت كنا استمرين عليها

5 - #المينى_باص

ينقسم لنوعان

• نوع عملاة الحكومة : فية شبة من الاتوبيس
• نوع استثمارى : فية شبة من الكروباص

6- #التاكسى

دى اخر حاجة يفكر فيها اى حد .. لية ؟

التاكسى الاسود بتعامل مقاولة و دا شى الناس بدأت تشمأذ منة اما التاكسى الابيض بيكون جميل بس فى المشاوير الكبيرة  ... بصراحة بصراحة انا شايف التاكسى مواصلة جميلة لكن لما تكون مع العائلة

( ملحوظة : لو العداد مش شغال ماتركبش خالص ) لحسن نرجع تانى للتاكسى الاسود

كدا نكون خلصنا وسائل المواصلات كلها ( ماتكلمناش عن الطيارة او القطار )

7 - #عربيتك

- امشى فى حارتك

- احترم الشارع

- ماتكسرش اشارة